Tell me better!

De next time I get de feeling as tho des lecturers up hey preparin me fuh wuk "fuh" somebody I gon really behave bad!

Fuh as long as I deh in school all I hear from teachers is "get a good education so you could go and get a job" dat mentality mus be been from since before me time.

Why des lecturers cyant teach people to get in de habit ah creatin jobs for we self.

All I get from des damn lecturers is "go and find ah wuk" when I graduate! I graduating wid hundreds ah odda people wid de same thing like me! De country don doh wan people wid out experience! But dey hardly givin students hands on experience! Now fuh de set dat does go straight from school and wuk, some a dem don get time off fuh improve dah self! Is weh we really goin man?

Now I hear dat Jason don wid UG and now he drivin taxi! De amount ah people I know dat leff dis campus and cyant get a wuk is a love!

If we start a association wid de ex UG students dat ain get a wuk yet! Ya gon know why we got so much ah car pun de road! Cause half a dem is taxi driver or bus people or deh wukkin outside deh field!

I now thinkin wha gon really happen to me when I come outta hey! Wha wuk I gon get when I don get meh degree? If any wuk at all! Or like I gaffa think bout flyin out like de ress a de country!

But as I start off! Why I thinkin so is because all meh life I hearin "go and find a wuk!" Instead of "go and mek a wuk"

All yuh change dis thing! Lemme feel as doh I could go out in dis world and mek a job fuh meh self! And if de oddas ain wan go and mek ah wuk! Dey could come and wuk fuh me!

UG admin people! Is ya'll I talkin to cause I know all yuh readin! Tell de chancellor and de V.C I seh!!

-Is nah me, is meh mouth
(Blaque)