Put ya money whey ya mouth deh

I tell ya, dese boys really wukkin up fuh dis president thing.
ya'll gon be good "poli -trick-ians" when ya'll grow up!

ya'll so accustomed to wha de big boys in de country does do dat ya'll feel dat it gon wuk wid everybody ya'll talk to. WELL!! NAH MI!

Dem boy seh dat Gay-nesh buy net and thing fuh de table tennis table in spicy. De boy like he go in he pocket and find some cash fuh buy thing. And all of a sudden, de boy wearing "shut n tie"

I tell ya! is one thing when ya wan big wuk in UG. They feel ya got to "look de part" before ya get de wuk. "IT DOAN WUK SUH!" Ya got to get brains FUSS, den ya gon get de looks, if at all.

I see U.S.A comin fuh dem again dis year! Just because ah dah name i nah gon vote fuh dem! i deh in GUYANA... not U.S.A! so to me, they ain' even thinkin bout de Guyanese people in de fuss place. Dem eyes pass me! And doan tek dem at face value ya know! Last year! dem U.S.A people de plenty!! they been around de place like red ants boy! Ya couldn't ah move without one a dem girl runnin in ya face in dem green jersey telling ya fuh vote fuh dem. And den i hear de leader been playin de "race card". ya feel dese people easy eh! Dem ain ordinary at all

I cyan wait fuh de "talk competition" i does get real kicks when dem boy does talk to fury, DEN! as soon as dey get de key to de city dem don wid ya.

Prezzie de talk all kinda thing about how UG admin fix dis and fix dah! and dey gettin dis and they gettin duh! and wham now eh?! where all de "fixin" gon? whey all de promises deh?

BARE AIR!!

DE revolutionaries, The student factor and U.S.A tek dis message and put it in ya pipe and smoke it. If ya don't smoke, DRINK IT! den cause i know ya'll does do duh.

"Put ya MONEY, whey ya mouth deh!"

To my fellow students, if i was ya'll i wouldn't a vote fuh none a dem! Because all a dem ain't got we interest at heart at all. All dey wan is de power and de lil stipend dey does get.
OH! ya'll didn't know nah! YES!!! dey does get PAY!

-is nah me, is meh mouth
(blaque)